ساوند كلاود عربي
اختبارات شخصية - غرائب المعلومات -
النتائج 1 إلى 1 من 1

الموضوع: دستورنا من أجل رقي المنتدى

  1. #1
    الصورة الرمزية r_mido
    تاريخ التسجيل
    Jun 2012
    الدولة
    Palestine
    العمر
    32
    المشاركات
    27,902
    معدل تقييم المستوى
    989

    دستورنا من أجل رقي المنتدى



    سعيدة

    /
    \
    //
    \


    رح نطرح وثيقة اتفاق فيها النئط الاساسية من اجل الارتقاء بمستوى المنتدى وانجاح العمل الاداري ..
    وطبعاً هالشي ما بتم الا بالتعاون بين اعضائنا الكرام مع الكادر الاداري والاشرافي حتى نكون ماشيين بخطى ثابتة للاعلى .

    هوامش :
    متل ما بتعرفو منتدانا مجاني يعني مارح ناخد منكم مصاري مقابل التسجيل .
    اي نعم عنا شوية حقوق محفوظة .. بس مشان الحلال والحرام الأشيا اللي بيكتبوها الأعضاء ما بتعبر إلا عن وجهة نظرون هنن ونحنا مالنا علاقة فيها لا من بعيد ولا من ئريب .

    ,

    الهدف :
    سـيـريــا روز ~ أسرة شبابية سورية وعربية ملؤها المحبة .
    توعية وتثقيف الشعب السوري والعربي .
    مناقشة مشاكل وهموم وقضايا شبابنا السوري ... بالإضافة للاهتمام بكل ما يخص الشاب السوري ثقافياً واجتماعياً واقتصادياً .

    ,

    التسجيل :
    • لما تسجل ع موقع سيريا روز فأنت مضطر تعطينا معلوماتك الصحيحة متل الايميل وبائي المعلومات المطلوبة بوثيقة التسجيل .
    • ياريت تفكر منيح منيح ئبل ماتختار اسم عضويتك حيث مايكون خادش للحياء او بيحتوي ع اي اساءة لأي ديانة او طائفة , بالإضافة انو نحنا منعتزر عن تغيير الإسم لأي سبب كان .. يعني ماتجينا بعد كم يوم وتنط بدك تغير اسمك .. ساعتا مارح تلائي ولا ادن صاغية .
    • حط بحساباتك انو بس سجلت ووافئت انت صرت مسؤول عن إي شي بينكتب من عضويتك ووحدك بتتحمل مسؤوليتو .
    • حركات أرعة ومخالفات ما بدنا .. لانو هالشي بخليك تخسر عضويتك معنا بدون ما نضطر نعوضك مادياً أو معنوياً .
    • اي استعمال غير مصرح به ع حسابك أو باسوردك انت ملزم بإبلاغنا عنو حتى تبري زمتك ئدامنا وتعطينا مجال بالتصرف السريع .
    • أي انتحال لشخصية أي عضو ان كان بتئليد الاسم أو الصورة الرمزية أو التوقيع , بيأدي لحزف العضوية .


    ,

    السياسة :
    • بمنتديات سيريا روز ممنوع منعاً باتاً وقطعياً التطرق لأي نوع من أنوع السياسة سواء كانت سورية أو عربية أو افريقية أو شرق اوسطية أو حتى تانزانية .
    • بخصوص الموضوع السوري , المؤيدين ع راسنا , والمعارضين بعيوننا من جوا .. بس بدكم ما تواخزونا عنا مافي أي مساحة للتعبير عن آرائكم فيما يخص سوريا .
    • المنتدى مش حكر لطائفة أو فئة معينة .... فرجاءاً عدم خلط سياسات الدول بسياسات الافراد والشعوب .
    • أي رد أو موضوع فيو مساس للنظام السوري أو المعارضة السورية بشكل مباشر أو غير مباشر بقصد أو بدون قصد مصيرو الحزف مع مخالفة صاحبو مخالفة اكسترا سكر دبل يترحم بعدا ع عضويتو .


    ,

    المواضيع :
    • طبعا مسموح جداً اللهجة العامية عنا بالمنتدى وبتئدرو تحكو بكل عفوية , بس مو تروحو تئلبوها مياعة ومياصة , يعني في أقسام بدها شوية جدية ( مش طالبين منك تكون بديع الزمان الهمذاني ) بس انو الحد الأدنى فقط .. بئا يرضالي عليك خلي المياعة للأقسام الترفيهية والجد للأقسام الأدبية والحوارية والتعليمية .
    • المنتديات الأدبية الها عنا شوية خصوصية , من بعد ازنكم أجمعين الكتابة بالأقسام الأدبية بالفصحى حصراااااً .
    • هلأ ئبل ماتنزل موضوع بدنا نعزبك معنا شوي زغيرة , انو يعني مارح تخسر كتير حريرات في حال عملت بحث عن الموضوع ئبل ماتنزلو .. لانو الموضوع المكرر رح ينشاط ع الارشيف حتى لو شفعلو فيو توم كروز .
    • المواضيع اللي بتخص الإختراق والمساعدة ع السرئة وما الى زالك كمان بلاها يستر عرضكم مو نائصنا أفلام رعب .
    • عنوان الموضوع بينكتب ع حالو وبعبر عن محتوى الموضوع ومافيو أي كلمة خارجة عن المحتوى أو اي مدات أو رموز ... يعني عملت موضوع بعنوان سيريا روز كتبلنا ياها هيك ع حالا ( سيريا روز ) وماتروح تعجئا بخمسين مدة ورمز هيك ( ~~*// ســـيـــــريـــــا روز \\*~~ ) لانو بهالطريئة رح تعزبنا بتعديل العنوان ومخالفتك في حال التكرار .
    • منعرف عنا مواضيع حلوة وكلها ئيمة وفائدة , بس موضوع صار بالصفحة التانية او التالتة او بعد ماتروح تنكشلنا ياه إلا بموافئة المشرف طبعا هاد في حال ما عندك شي كتير ضروري تضيفو ع الموضوع , غير هيك رسمالها علينا نحزفو ونخالفك عند التكرار .
    • بس أدرجت الموضوع انتئلت ملكيتو من اسمك لأسم المنتدى , فما تفكر ولو مجرد تفكير انو تطلب من الإدارة تحزفلك موضوع ... إلا إن عندك سبب مقنع جداً جزيلاً .
    • هلأ شفت موضوع مخالف أو فيو اساءة , لا تعمل عنتر وتنطلو لصاحب الموضوع بدك تخانئو حتى ماتكبر الئصة ونكون بمشكلة نصير بعشرة .. ياريت تبلغنا وتتركنا نحنا نتصرف .


    ,

    المشاركات :
    • شيت انك تفوت ع موضوع حواري او نقاشي وتغير بمسار بالموضوع تئضيها سمايلات عم تنط .. هون رح تنحزف ردودك وردود اللي ردو عليك كلها .
    • اذا حابب تطئ حنك في دردشة وفي برايفيت , روح فرغ طائاتك فيون .. يعني اذا ع بالك تتطمن ع فلان ليش مو مبين أو فلانة ليش عملتلك بلوك ع الماسنجر روح استفسر عنون برا الموضوع .. بالمواضيع منسمحلك برد واحد فقط أو اذا عندك إضافة ضرورية ع الموضوع مافي مشكلة .
    • تركنالك ربع ساعة كاملة مكملة لتعدل فيها ردك .. فإن صار وراحت هالربع ساعة وما عدلتو بدك ماتواخزنا مافينا نعدلك ياه إلا للضرورة .. وعن طريئ استخدامك لزر التبليغ عن مشاركة سيئة حصراً , لهيك يا عزيزي تمعن بمشاركتك ئبل ما تطجا .
    • المشرف أو المنسق أو الإداري مانو مضطر يبلغك أو يعطيك خبر بأي تصرف بتصرفو تجاه أي مشاركة أو موضوع بخصك .
    • أي مساس بسيادة أي دولة أو طائفة أو دين رح تنحظر عليه حظراً مبرحاً حتى تستغيث .
    • في حال شفت شي مشاركة مخالفة أو فيها اساءة لاتنط وتاخد الئصة على عاتئك , ما عليك غير انو تكبس ع زر التبليغ عن مشاركة سيئة وتتركنا نحنا نتصرف .


    ,

    العلاقة بين الأعضاء :
    • بسيريا روز ما بهمنا ميولك ع ئد ما بهمنا طريئة طرحك لميولك بالدرجة الأولى , واحترامك لزملائك بالدرجة التانية .. وطبعاً الإداريين بندرجو ضمن زملائك .
    • اي مشرف بيحزفلك رد او موضوع ما بكون عم يسبك بحدا من عيلتك ولا نازل تزمير بسيارتو تحت شباكك .. فما في داعي كتير تتنرفز وتجور ع اعصابك يعني هو لو ما بعمل كل هالئصة ارحملو واريحلو ...... بس هاد واجبو .
    • لما تسب او تشتم او تغلط ع اي عضو جائزتك مخالفة اكسترا دبل .. نحنا ما عم نئول تحب بعض بس الاحترام واجب بين الجميع .
    • متل ما نحنا منسعى لنريحك ونساعدك ونكون جنبك كمان انت فكر فينا شوي واحترم قوانينا شويتين , يعني بالنهاية نحنا ما مضطرين نعملك منتدى ع مزاجك .


    ,

    الإداريين :
    • اول شي حط ببالك انو الاداري مش شغال عندك ولا عند أبوك , وهو ما عم ياخد إجرة من المنتدى .. بالنهاية هو شخص متبرع بشي من وئتو وتفكيرو ليخدم هالمنتدى , فما كتير تجور عليه بطلباتك , واهم شي احترمو .
    • الإداري بشر مش مكنة وماعندو ئدرة ليتابع ويلاحئ كل مواضيع ومشاركات المنتدى لهيك ما بيطلع منها شي اذا بتعزب حالك وبتساعدو لما تشوف شي مخالف بالضغط ع زر التبليغ عن مشاركة سيئة .
    • في حال شفت خلل تقني أو فني بإحدى الصفحات أو الأقسام فيك تتواصل مع الادارة عن طريئ الرسائل الخاصة او ضمن موضوع بقسم تواصل معنا .


    ,

    ألقاب الأعضاء :
    • من 0 مشاركة
    • من 100 مشاركة
    • من 500 مشاركة
    • من 1000 مشاركة
    • من 2000 مشاركة
    • من 5000 مشاركة
    • من 10000 مشاركة
    • من 15000 مشاركة


    ,

    المخالفات :
    • إستخدام طرق كتابة تقنية غير مناسبة : 10 نئط منتهية 5 أيام
    • إستخدام ألفاظ غير لائقة : 15 نئطة منتهية 10 أيام
    • مخالفة قوانين القسم الخاصة : 25 نئطة منتهية 15 ايام .
    • الإهانة المتعمدة لعضو آخر : 35 نئطة منتهية 25 أيام .
    • الإهانة المتعمدة لشخصية سياسية : 50 نئطة منتهية 30 أيام .
    • الإهانة المتعمدة لإحدى الطوائف : 50 نئطة منتهية 30 أيام .
    • مخالفة قوانين زهرة سوريا : 100 نئطة منتهية 50 أيام .
    • مخالفة قوانين زهرة سوريا : 200 نئطة منتهية 50 أيام .


    اذا عضو صار نئاط مخالفاتو 100 نئطة بيروح تلقائياً ع السجن , وان صارو 200 نئطة حظر تلقائي .







    دمــتـــم
    27/6/2012

    التعديل الأخير تم بواسطة r_mido ; 07-05-2012 الساعة 08:42 PM

المفضلات

المفضلات

دسـتـور الـمـشــاركـة

  • ما بتئدر تكتب مواضيع جديدة
  • ما بتئدر ترد على المواضيع
  • ما بتئدر ترفق ملفات
  • ما بتئدر تعدل مشاركاتك
  •