إعـــــــلان

تقليص
لا يوجد إعلان حتى الآن.

زرقاء ام حمراء ؟

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • زرقاء ام حمراء ؟

    بسنة 1999 وئت شفت فيلم The Matrix ضليت عايش حالة اكتر من اسبوعين بس لمجردة فكرة الخيارين المصيرين يلي فيه

    وئت نيو
    Neo بيروح مع مورفيس Morpheus وبيعرض عليه الحبتين

    الزرئا والحمرا

    الزرئا يلي اذا اختارا بيكون اختار الرضا بالجهل وبيتنعم بالغباء والوهم وبيضل عايش الحياة يلي هو فيها بالاساس


    الحمرا اذا اختارا حيكون في الم وعذاب وخيبات امل بس بالنهاية حتكون الحئيئة بدون تزييف

    اكتر شي مؤسف انو كل الاشخاص يلي شافوه بهديك الفكرة لخصوه على انو فلم اكشن جديد وتكنولوجيا تصوير جديدة وخيالي كتير وابعد من الخيالي بمراحل



    من وئتا عرفت انو كلشي بالنسبة الي حيكون صعب وماحكون منسجم مع العالم وبالفعل بلشت من وئتا

    وهي هية حكاية
    الزرئا و الحمرا

  • #2
    يفشل التدوين العربي لعدة عوامل ومعظم هذه العوامل غير منطقية


    افتقار المدونين لبعض اساسيات التدوين , التدوين مثل اي نشاط في هذه الحياة له اساسيات وقواعد ولكنها مفتوحة وقابلة للتعديل والتغيير بحسب كل مدون واحتياجه لتحويل الاساسيات ولكنها تظل ضمن مجموعة ضوابط اساسية


    الكلام المدون ليس كلام مقدس او منزل وليس اسطوري وغير قابل للنقاش او السؤال او النقد
    وطالما انك دونت اونلاين بالتالي كن على يقين بان تدوينتك معرضة بنسبة 97% للاستباحة والسرقة والتحوير والتحريف والتزوير


    مزاجية المدون العربي تغلب وتطغى حتى على تدويناته الصريحة الجدية وهذا شيء ايجابي ومفيد ولكن بعض ضعفاء العقول من المتابعين ممن اعتاد قراءة اخبار الصحف المحلية التي صممت خصيصا لترضي اذواق شاري الجريدة تجده ينتقد ويذم اسلوب المدون لانه ما اجا على هواه


    الاسلوب النقدي العاهر لبعض المتابعين , اي نعم هو اشبه ما يكون بالعهر العلني فتجد اشخاص مهمتها احباط الهمم والاستعلاء والاستكبار على تدوينات قد يكون بعضها شخصي وحساس ويلامس جوانب من روح المدون فتجد هذا الناقد العاهر يسترسل بعربدته الكلامية موجه سيل من الانتقادات والسخرية واذا بحثت عن اثار هذا الناقد لوجدته عديم الفكر والتدوين , مهمته فقط احباط الهمم والنوايا لكل من هو ايجابي


    ومن اهم العوامل مقارنة المدونين بعضهم لبعض والتدوين العربي بالتدوين الغربي , وهنا يكمن الفشل الذريع
    ليس بامكانك ان تقارن بصماتك او حمضك النووي او الخريطة الجينية الخاصة بك مع اخرين وتصاب بصدمة لعدم التطابق
    وهذا هو حال المدونة ليس من المفروض ان تشبه احد


    وحاجة اليوم

    تعليق


    • #3
      ابداع البشرية كان بالسبعينات ولساتني مصر على هاد الشي من بعد السبعينات كلو صار استهلاكي
      في طفرات بس مو متل فترة السبعينات
      بيكفي انو كلشي شغلات حلوة طلعت بهداك الوئت
      بيكفي اني انا اجيت بنص السبعينات
      مو حاجة بالله؟

      تعليق


      • #4
        عشتا تماما لتبع حدث ولا حرج بكل التفاصيل

        كنت اتعرف على ناس لانو حبو يئربو مني مدري شو شافو شي شدهن اكيد شي غريب كالعادة
        بعد فترة بيصيرو بيتصرفو معي بطريئة عدائية كتير بطنش متل عادتي وما بسال
        بعد فترة باكل بهدلة غير شكل انو انا ما بيلبئلي ومافيي احساس
        لانو ماحسيت انو هنن تئربو مني وانا ماكنت سعيد ولا عملتلهن تماثيل بحياتي وماصرت كل يوم اسال عليهن واتطمن عليهن
        لانو هنن باعجباهن بشي فيني عم يخلوني استمر بالحياة واتنفس وعيش وكانو هنن عيشوني بنفس اللحظة يلي قررو انو يحبو يصيرو رفئاتي

        معلش لا تسمحولي بس انا مالي داير جمع رفئات ومابدي علاقات ولابدي معجبين ولا محبين ولابدي حدى يعمل اي شي ولايبذل اي مجهود كرمالي ولا مشاني ولاحتى ذرة فوسفور وحدة ليفهم شي
        انا متل التراب الدنية مليانة مني وبحب ضل محلي ومرتاح مع حالي ومع كل المحتويات يلي جواتي

        سدئوني فتو وطلعتو وحركشتو وعملتو عجئة وبالاخير رحتو وراحت معكن اثاركن وشغلاتكن كلها

        انا مالي وفي للاصدقاء لاني ببساطة ماعندي ايمان بالصداقة ولا باي نوع من انواع العلاقات الانسانية غير الحكي

        انا لا تبع حب ولا تبع مرافئة ولا مساكنة ولا مصاحبة ولا مرازلة ... انا بس حكي عشرين ساعة تلاتين ساعة خمسين سنة نضل عم نحكي ايه
        عم نشرب ئهوة ايه
        عم ندخن ئيه
        واي شي تاني مو ئيه ولا ايه

        بس وحاجة

        تعليق


        • #5
          نرجسي
          مجنون
          غير متوازن
          مختل احيانا
          حالم
          حالم مبالغ فيه
          سريالي
          مفصوم
          بعيد عن الواقع
          واقعي بشكل مميت
          ماعندي ئلب
          بفهم يلي بدي ياه
          مابعطي اعذار
          بالي طويل
          لئيم
          بتصرف تصرفات حقيرة اوئات
          بحب حالي
          مابيهمني غير حالي
          اناني
          مدخن
          مدخن
          مدخن
          مئذي بالضرب
          مدخن
          بئرا كتير
          بصفن كتير
          بشرد كتير
          مدخن
          ادمان عالكافيين
          مدخن

          كل هدول يلي حكيتون
          انا هيك بشوف حالي

          تعليق


          • #6

            كل مابفكر حالي فيي اكتب عنو برجع بحس حالي انو لاء لسى في شي مائدرت اوصلو فيه
            صرلي عم شوفو اكتر من 15 سنة
            في اشياء بتضل اعظم اذا ما حاولنا نفسرها او نحكي عنها
            يمكن هدول مشاعر ومحاسيس عند الناس بين بعض بس انا موجود عندي بيني وبين الافلام والكتب والميوزك
            بس هاد من الشغلات يلي خلتني اعرف كيف فيي عيش بهي الدنية
            وخلاني اعرف انو في كتير تصرفات ماممكن حدى يفهما غير يلي عم يتصرفها
            بالوئت يلي كل الدنية بتشوفها غلط هو بيكون بيعرف انو هاد قمة الصح وبعد حوالي 10 سنين بيعرفو انو فعلا هو كان صح

            حبيت فيتو كتير وتمنيت لو كان عندي انسان كبير هيك بحياتي اعتبرو متل اب الي , ومن ورا هالئصة في كتير صرت اتمنى يكونو موجودين بحياتي
            فيتو كان امتداد لمايكل ... ومايكل كان المزيج الفريد المميز للانسان بكل معنى الكلمة بس ضوابط الرجولة خلته يخفي جوانب كبيرة من انسانيته وحمل مسؤولية شي فوق طاقته بس نجح لانو مابدو يفشل

            كل ماكنت (رجل) ناضج اكتر كل ما استمتعت بمشاهدة غادفاذر اكتر
            وكالعادة النساء مالهن فيه لهاد الفيلم واذا صار وشافوه فحيتعاطفوا مع مرتو (كيي)

            تعليق


            • #7
              كنت مفكر انو الابطال الخارقين بس لما بيكون الواحد مراهق او طفل
              ماكنت بعرف اديش مهم وملهم وجود شخصية بحياتك بتدلك شو تعمل او كيف تتصرف ولو لفترة مؤقتة
              اعادة اكتشاف نفسي بلشت بمرحلة غريبة وئت شفت اول جزء من الافلام التلاتة يلي بيحكو فيها عنا بات مان Batman وتحديدا السلسلة يلي حملت رؤية جديدة لمخرج عبقري اسمو Christopher Nolan

              بلش اول جزء بالـ 2005 واسمو Batman Begins




              طريئة السرد والسيناريو وطبيعة الحوارات مختلفة تماما عن اي فيلم شفتو من ئبل بيحكي ئصة سوبر هيرو بس بطريئة بايوغرافي وكانو انسان حئيئي عايش بيناتنا وكان الو دور بتاريخ البشرية

              وئتا ماكان تركيزي عالمخرج او الكتاتب بمقدار تركيزي اديش حرك فيي مشاعر ماكنت بعرف انها موجودة .... اي نعم فيلم اكشن بيحكي عن سوبر هيرو حرك فيي مشاعر انسانية كنت مفكرها معدومة عندي

              حسسني للحظات انو انسان متل بروس وين حتى بعد ماصار ملياردير وعندو كلشي بيحلم فيه بيضل جواته شي مكسور لانو عاش يتيم , بس الفرء بيني وبين بروس انو انا مو ملياردير وماعندي حدى متل آلفريد بينيوورث

              وماعندي حدى يساعدني بشي عم فكر فيه متل لوشيس فوكس .. بس كان عندي نفس الدافع الموجود عند بروس انو بدي غير كل شكل حياتي بالعلم وباني اعرف اكتر

              وكتير شغلات ماعندو ياها متلي ... الرفئات ... الاصدقاء .. العالم يلي بتسال

              والحب يلي انوجد عندو وعندي هو نفسو يلي كسرنا وخذلنا بوئت من الاوئات وحكم علينا بطريئة سلبية لانو معتمد عالمظهر مو متل مو موجود جوا

              الثيم الاساسي لهاد الجزء كان بيحكي عن الخوف , مخاوف بروس من الخفافيش وعلاقته بابوه يلي عمل كلشي بالحياة كرمال مدينته (غوثام) وعلم بروس يكون متلو وفعلا محور حياة بروس بعدين كان كلها غوثام ... المدينة

              وبعد ما شفت الفيلم 3 مرات قررت اني افهم طبيعة دماغ هالانسان العظيم يلي كتب الفيلم واخرجه وبالفعل ماخاب ظني ... Christopher Nolan او متل ما بتئلو مرتو Chris من الناس يلي حتغير شي بالبشرية وحيجي يوم ينحكى فيه السينما قبل كريستوفر نولان والعالم بعد كريستوفر نولان

              من المشاهد يلي عنجد اثرت فيني وحسيت حالي دمعت ... وئت بيتصل بالفون ومابيئول غير آلفريد .... لعما يا جماعة اديشو عظيم وفظيع ورائع هاد الشعور انو يكون عندك انسان بس يسمع منك كلمة يفهمك ويعرف شبك

              حاحكي عن الاجزاء التلاتة كلهن

              تعليق


              • #8
                بعد 3 سنين طلع الجزء التاني وبصراحة كنت نص متحمس للفكرة لانو ماكنت متخيل انو ممكن يكون في شي جديد وخصوصي انو تعودت على سلسلة باتمان الئديمة كان كل جزء ممثل شكل ومافي ترابط بالئصص غير انو باتمان

                وكان عنوانه The Dark Knight ومو مذكور كلمة باتمان

                بس بهاد الجزء من اول ربع ساعة اكتشفت مدى (عبقرية) كريستوفر نولان استمر مع نفس الممثلين وتابع الفكرة يلي بالجزء الاول طبعا مع الحوار صاحب البعد (الفلسفي) متعة الحوارات والكلام واسلوب نقاش الافكار والحديث عن الخير والشر ونسبية الاشياء

                وكيف الفوضى هي عامل اساسي وعادل بحياتنا

                وطبعا الذهول التام كان من نصيبي وانا عم تابع شخصية الجوكر The Joker يلي اداها باحتراف واقتان الممثل الراحل Heath Ledger يلي كانت اخر عمل بيختم فيه حياته المهنية وترشح بعد وفاته لجائزة اوسكار افضل ممثل مساعد وربح واستلم عنو الجائزة كريستوفر نولان .. يلي اجل اصدار الفيلم 6 اشهر عن موعده اكراما لروح هيث


                وئتا عرفت شو يعني مافي شي اسمو شر بالمطلق وكيف انو كل الامور نسبية بالحياة
                وئتا عرفت كيف انك ممكن تنفهم غلط بكل تصرفاتك وماحدى يفهم شو عم تعمل الا ناس ئلال كتير وكيف تاخد خيار وتتحمل نتائجه والناس ممكن تظلمك بس كلو في سبيل الخير الكبير للانسانية والناس من حولك

                كيف كل الاشياء المتعاكسة بتكمل بعضا بكل الاتجاهات


                تعليق


                • #9
                  تاخرو علينا 4 سنين حتى طلع الجزء التالت وكان بقمة الكمال

                  من حيث كلشي .. التصوير .. الاضاءة .. الساوندتراك ... وطبعا الحوار المقدس والصراع الانساني والمفاهيم

                  وسمولنا ياه The Dark Knight Rises

                  ملحمة انسانية متكاملة ولا لحظة فيها كان باتمان انسان خارق , كان عبارة عن انسان عادي متفوق فقط بالقدرات العلمية والانجازات التكنولوجية ولهيك كان عم يئدر يعمل كلشي
                  حتى حالة الطيران كانت مبررة والدروع يلي بيستعملها والكاب تبعو كلشي كان مشروح باسلوب بيئبله العقل والمنطق وكان جدا واقعي

                  ولاول مرة خلال افلام الابطال الخارقين على مدى 3 اجزاء منشوف بروس ويين عم يعاني من كسور وجروح ورضوض واصابات وتسمم , كان انسان متلنا متلو بس عندو قناعات وهدف مابيحكي للعلن




                  حواره مع بليك وئت بيحكو عن الميتم وسر الابتسامة المصطنعة ويلي وراها شي وكيف كل الناس بتعمل حالا متفهمتك بس بعد شوي بيصير بدهن منك تلتزم

                  حلم الفريد بالنسبة لبروس وشو بيحكيلو وكيف بيتصرف بروس بالاخير

                  كيف بليك بيرجع بيعطي درس بالايمان لرجل الدين باخر ربع ساعة

                  كيف وئت جيمس غوردون بيأمن فيه لبروس وكيف وئت بيكشفلو الحئيئة

                  كيف انك تحس حالك انتهيت ويرجع شي من جوا الانقاض يحييك

                  كيف وئت بيقرر انو لازم يعيش ويتمسك بالحياة وكيف نجح

                  كيف الفريد بيفكر حالو خذل بروس وبالاخير بيتوضح كلشي

                  وكانت الحركة العبقرية بالجزء يلي دمجو فيه حوار من قصة مدينتين .. الحوار يلي بينحكا على لسان سيدني كارتون وئت المناسبة لبروس

                  من وئت طلع لهلئ شفتو اكتر من 9 مرات وبكل مرة نفس الاحاسيس بتتحرك وكاني عم شوف شي من الطقوس المقدسة او كاني عم عيش رهبة صلاة

                  كريستوفر نولان .. انا مدين الك بالكثير ولو اني انسان صعب اعترف هيك اعتراف بس انا مدين لك بالكثير الكثير

                  وهيك بيكون خلص حديثي عن الاجزاء التلاتة المرتبطين بشكل خارق واحترافي وانساني

                  تعليق


                  • #10
                    من الاشياء الغريبة ويلي بتضل بتجي ع بالي وبتروح
                    شو هو شعوري لو كان عندي اخ .. او اخت
                    كيف ممكن يكون احساسي وكيف ممكن تكون علاقتنا

                    مع اني كتير بسمع شغلات سلبية عن الاخوات بس بحس انو هدول الناس يلي بتوصل لهي المرحلة من المشاكل عندهن شي غلط
                    مع انو اخوه لابي ماكان شخص منيح معي وماكان اخلاقي بس على الاقل كان اخوه لابي ... بيكفي انو حكالي شغلات عن ابي ماكنت ممكن اعرفها غير اذا سافرت بالزمن لورا

                    ماعاد عديتهن كتير للشغلات يلي راحت عليي ومائدرت عيشا ومافيي ارجع عيشا لانو بالنهاية هدول مو من خياراتي ... هدول اضافات الحياة والدنية للناس بين بعض

                    جربت بوئت من الاوئات انو اتخيل عندي اخ وعم ابعتلو ايميلات بس ماكان يرد عليي

                    ايه عملت ايميل وماحفظت الباسوورد تبعو شو هية وصرت ابعت عليه كلشي بيصير معي ومتل اعترافات

                    مرت عليي ايام اتخيل انو ممكن افتح الانبوكس لائي منو ايميل او رادد عليي بشي ايميل

                    يلي عندهن اخوات مابيعرفو اديشو عظيم هاد الشعور ولو كان في بينكن مشاكل .... مو شخص متخانئ معو ومابتحكي معو ومابتحبو مثلا لاخوك؟؟؟ معلش المهم انك عم تعيش هاد الشعور تجاهو

                    آه بس لو تعرفوا

                    تعليق


                    • #11
                      اول مرة بجرب اكتب عنو للفيلم من وئت شفتو ... كنت احكي عنو بطريئة مرور الكرام بس ولا مرة خطرلي اني ممكن اكتب عنو بوست

                      Inception

                      تتمة سلسلة ابداعات العبقري
                      Christopher Nolan

                      مشروع سيناريو الفيلم استمر في كتابته 10 سنوات معتمد فيه على دراسات وابحاث ووقائع علمية كاملة ومجربة ومثبتة النتائج

                      خلط عالم الاحلام بالواقع

                      وفن الايحاء ... زرع الفكرة بالشكل البسيط في العقل الباطن للانسان ليقوم بعدها على هذا الاساس بتصرفات واتخاذ قرارت في حياته قد يظن انه هو صاحبها وصاحب الارادة كاملة بها



                      من انجح الافلام من حيث النقاط الاساسية ... طبعا السيناريو فلسفي حقيقي
                      انتقاء مواقع التصوير
                      الاضاءة
                      الموسيقى التصويرية
                      والاهم من كل هذا الرسالة المختلفة التي قدمها الفيلم

                      من اهم واول الافكار المثيرة للجدل والواقعية الخلاقة بامتياز تطرح على شاشة السينما بهذه الدقة والوضوح والوعي الفكري الناضج

                      يسطتيع المشاهد العادي الاستمتاع بالفيلم للحبكة وتسلسل الاحداث ... لكن كن على ثقة بانه يحتاج الى مستوى عالي من الـ IQ ليتمكن المشاهد من استيعاب الزخم الفكري

                      يعالج موضوع الهندسة الاجتماعية واسلوب الايحاء الغير مباشر للانسان

                      ويتحدث عن عالم الاحلام ... وكيف ان الانسان لايشعر بانه كان يحلم الا بعد ان يستيقظ
                      ويتحدث عن فكرة استحالة اي انسان ان يذكر كيف بدأ الحلم دوما يجد نفسه في منتصف الاحداث

                      النشاط الدماغي يزيد بنسبة 80% اثناء الحلم لان العقل يعيد بناء مكونات الحلم جميعها فما تراه في منامك هو عبارة عن صورة انتجها العقل... فمثلا لو كنت ترى حلم بانك في غرفة النوم فاعلم بان دماغك اعاد انشاء الغرفة من الصفر ولم يستعمل صور لغرفتك من مخيلتك

                      فالدماغ يعيد بناء كل المشاهد والمناظر وحتى المشاعر والروائح والضوء وشدة اللمعان والسطوع كلها نتاج العقل البشري ... لذلك لاتستطيع ان ترى الشمس في منامك

                      انسيبشن نقطة تحول جذرية في حياتي

                      تعليق


                      • #12
                        من المواقف التي تتكرر دوما وبلا انقطاع

                        عندما تبدي رايك او تتحدث باسهاب منطقي عن الذي (تعرفه) حق المعرفة يتسال من حولك عنك
                        تبدأ بعدها حالة استكشافك وسؤالك عن رايك وافكارك ومحتوياتك وبعد ان يتم (التحقيق) معك رغم انك ما بست ايدو لحتى يسالك او يتعرف عليك

                        وبعد ما يخلص ومتل ما بيحكوها بالعامي (يترسمل) بيبلش رحلته الشهيرة الدائة بالـ(الانتقاد) السلبي العنيف لافكارك وتوجهاتك وبيحاكيك وكانه اعلم اهل الارض

                        مع العلم بانه ... ما احترم فارق العمر والتجربة الحياتية اليومية بينك وبينه ... ما احترم الثقافة الانسانية يلي عندك ... ولا احترم ثقافتك التعليمية يلي متفوقة عليه بمراحل

                        بس هو بيعرف انك انت غلط ... مع انو مو ئاري عناوين الكتب يلي اريتا واطلعت عليها وعنده استعداد يناقشك بفكرة مابيعرف عنها اي شي غير اسمها يلي سمعو منك ابل خمس دئايئ بس هو متاكد انو هو صح لانو دينو صح

                        حبيبي ... حبيبتي ... دينك سواء كان صحيح او مو صحيح طالما انت عندك ايمان فيه فهاد الشي حلو حتى تكمل رحلة بحثك عن الحقيقة والمعرفة .... اذا امنت مو معناها ختمت علوم الاولين والاخرين والقادمين وما بينهما

                        معرفتك لتفاسير وقصص واسباب نزول وروايات ما بتغني عن قانون فيزيائي او نموذج تشريحي او تحليل لهرمون بشري واسباب فقدانه

                        قد يكون في تقاطع وفي تشابه وفي اشارة بمقدسات ديانتك لهاد الشي ... بس انت ما عطيتني الحل وئت كنت عم ابحث ... انت اشرت لهاد الشي بعد ما انا خلصت بحثي يلي اخد مني وئت وجهد وتعب وترجمة وخلايا من دماغي وعيوني وعئلي

                        مابسمحلك تصادر مجهودي بس لانو كانت عندك الخلاصة وانت ماكنت واعي الها بس بعد ما خبرتك بالي وصلت اله تجي تئلي والله عندي من الاف السنين هاد الكلام

                        ليش ماشاركتني فيه ؟؟؟ لانو بالاساس انت ماكنت بتعرف انو عندك لوئت خبرتك وعملت الاسقاط تبعك .... اكيد بدي احترم كتابك وقدسه اكتر منك وبدو يدفعني فضولي وشغفي بالعلم اني اطلع عليه وائراه متلك بس بدون حالة التلحين اللفظي وبدي اطلع عليه من منظور علمي وفلسفي وفيزيائي
                        ويعجبني

                        لانو حاكي وذاكر اشياء انت مو منتبه الها نفسك يلي بتمارسه كل يوم بحياتك , لانو مو غلط انك تنظر للامور بشكل مختلف

                        انت بتعرف يا صديقي المتزمت والمتشدد انو الاعمى (يلي خلئ اعمى) ومابيشوف الدنيية ولابيعرف شو هية الالوان ... انو عندو عالمو الخاص وكل فترة وفترة بتتبدل وجهة نظره بالاشياء اكتر من صاحب البصر من بينا نحنا البشر

                        عبر عن رايك بافكاري طالما انت قادر انك تنتقدها ولا تعيب عليي مو بيئولو مين عيب ابتلى ؟؟؟ بركي ابتليت بحدى من حبابك وكان متلي ؟؟؟ بتكبو؟؟

                        لازم تعرف تتعامل معي ومع امثالي لانو نحنا مو جذام ولا مرض ... نحنا ولاد هي الحياة وهاد المجتمع والنا اب وام ومن لحم ودم وروح واحساس

                        عنا انسانية وعنا حنية وعنا ئلب وعنا عئل كل المختلف انو نحنا كان عنا جرأة نسال وانت رضيت بالي انت فيه

                        نحنا مو جايين من برا ولا حدا دافعلنا مصاري لحتى نهدم ونخرب ... نحنا عنا ايمان بالانسانية وعنا ايمان بالخير جوا النفس البشرية لانو الانسان مستحيل يكون شرير بالمطلق

                        انا مالي جاية هاجم حدى ولا انتقد حدى ولا استهزء او اتمسخر على حدى

                        انا جاية عيش حالة تعايش وانسجام مع ولاد بلدي مع الناس يلي ممكن يكونو حوليي بكل مكان

                        ممكن يكون كتير شب من هالشباب واحد من يلي بسلم عليه وئت بروح على الئهوة او لعند بياع العصير او الصيدلية

                        وممكن تكون بنت من هالبنات هية وحدة من يلي بشوفهن ومنبتسم لبعض من بعيد لبعيد وبحس بتفائل فيهن

                        نحنا مو كلاب ولا اوغاد ولا ابناء ابليس ... نحنا متل بعض وتركيبنا وتكوينا الجسماني والفيزيائي متل بعض .. شربانين من نفس المي واكلين من نفس الاكل وعم نتنفس نفس الهوا ولما كنا صغار حبينا ولعبنا بنفس الالعاب

                        شو يلي تغير؟؟ الافكار يلي جوا راسي وراسك يلي مو ملموسة ؟؟؟؟ بتعمل فينا هيك ؟؟؟ بتخليك تاخد موقف مني ؟؟ طيب ليش؟؟ شوعرفك شوفي جوات البي؟؟؟ بركي انا عندي حب تجاهك اكتر من حبيبك او حبيبتك ؟؟؟
                        بركي عندي انسانية ورئفة وتفهم لمشكلتك وشعورك اكتر من اهلك؟؟؟؟

                        مو الرب بالمعتقدات مابيرضى بالظلم؟؟؟ والانسانية مابترضى بالظلم؟
                        ليش فيك تظلمني وانا انسانيتي واخلائي ما بتسمحلي اظلمك ولائيلك عذر وتنين وعشرة ؟؟

                        ومع كل هاد بالاخير وئت بتزعجني وبتجرحني وبتئهرني لازم ما ازعل لاني انا بستاهل بنظرك انا مختلف عنك ومو متلك ولازم اتعزب بالدنية ولازم فوت على نار جهنم بالاخرة

                        لانو انا مالي سادي؟؟ لانو ماحكمت عليك واحترمت جواتك متل براتك

                        انا بحبك لانك انسان ... مو لانك شب ولا لانك بنت ولا لانك حلو ولا لانك بشع

                        لانك روح ... والروح بتنحب لانها سر وماحدى فينا ممكن يكره السر

                        تعليق


                        • #13
                          هناك اماكن تذهب اليها الروح واماكن اخرى تسكن في الروح
                          ارتباط الذكريات باحاسيس الانسان وليس بعقله هي السحر الذي يمارسه العقل على الجسد
                          قضيت فترة لابأس بها من سنوات حياتي اراجع ذكرياتي وكيف تعمل بداخلي كل مرة بنفس الاسلوب
                          احيانا وانا معلق بين حالة من الصحو والهذيان استطعت ان استحضر نفس الشعور واعيش نفس الحالة والمرحلة والعمر
                          لقد استطعت ان اعيد لنفسي الاحساس السعيد الاول لي في حياتي ... كانت تجربة من التجارب النادرة والفريدة في حياتي التي اشعرتني باهمية ذاتي لوجود ذاتي
                          ليس شيء اخر او احد اخر .. فقط انا

                          تعليق


                          • #14
                            الاسرة السعيدة المكونة من الاب والام والطفل الصغير ذو الثلاث سنوات يتناولون الافطار في المطبخ
                            ليذهب الاب الى الغرفة المجاورة ممسكا بكوب قهوته ليتمم جمع اشيائه ويتوجه للعمل
                            فاذا بالام فور خروج الزوج من الغرفة تفرد جناحيها الابيضان ليصلا الى سقف المطبخ
                            يبتسم الطفل ويشير باصبعه الصغير باتجاه امه ويقول بكل برائة ودهشة وبريق عينين ماما تطير
                            يسمع الاب فيأتي مسرعا ويصاب بالذهول ويسقط فنجانه على الارض وينسكب السائل القهوائي على ثيابه ويصاب بصدمة من المنظر

                            التحليل المنطقي للسيناريو اعلاه :

                            العقل المتسائل (عقل الطفل) يتقبل كل ماهو في خانة (المستحيل) والـ(غير منطقي) لانه جديد على هذا العالم ولم يتم تخريب تفكيره باشياء غبية حمقاء
                            الاب الواعي (عقل ناضج) لم يتقبل فكرة الاجنحة لزوجته لانه (انحصر) في اطار بان الانسان من المستحيل ان يمتلك ادوات للطيران

                            فهنيئا لكل من يمتلك عقل طفل يتقبل اغرب الافكار برحابة صدر ويؤمن بها ... وعلى يديه تصبح في احد الايام حقيقة

                            تعليق


                            • #15


                              As two kids who always spent
                              Their time and played with toy guns in their hands
                              There you stood in front of me
                              They taught me that you're my enemy


                              And when our eyes have met
                              We both set sails to death
                              With guns of grown up men
                              I fear it might be my last breath


                              Eye to eye
                              Our aim is blinded by the sun
                              Seeking higher ground
                              To a safe haven I now run


                              The night had fell on no man's land
                              This flute was heard from out there in the dark
                              I knew the words and joined in song
                              This nightly truce a miracle of hope


                              We raise our hands and walk
                              Upright to move towards each other
                              No guns, no death between
                              The enemies now turned to brothers


                              Together on this barren earth
                              I tell him of my son
                              No pawns or deadly toys
                              The morning comes, and we are done


                              We head to base and end the truce
                              That lasted through this war of liars
                              A vision of a better life
                              Where music drowns the toy gun's fire


                              Next night I see a shadow and
                              We both shoot in the name of god
                              As we fell down our eyes have met
                              Our friendship ends now in this turmoil of blood

                              كطفلين كنا نمضي اوقتنا نلهو
                              ونلعب بمسدسات اطفال وهمية
                              وكنت تقف امامي وقد علموني
                              علموني بانك عدوي
                              وفي لحظة التقاء اعيننا
                              بنفس تلك اللحظة ابحر كلانا باتجاه الموت
                              وكنت اخشى بان الفظ انفاسي الاخيرة
                              عينانا تعميها الشمس عن الهدف
                              بحثنا عن ملاذ لنحتمي هاربين


                              وخيم الليل على تلك الارض منزوعة السلاح
                              صوت الناي القادم من عمق الظلام
                              لقد كنت احفظ الكلمات وغنيت مع اللحن
                              هذه الهدنة الليلية ... معجزة من صنع الامل
                              باتجاه بعضنا تحركنا
                              لا وجود للمسدسات بيننا ولا وجود للموت حتى
                              الاعداء امسوا اخوة ... اخوة
                              معا في هذه الارض الجرداء القاحلة
                              اخبرته عن ولدي
                              لن اسمح له بان يلعب بالبيادق والالعاب القاتلة
                              اتى الصباح
                              وانتهينا


                              عدنا .. كل منا الى قاعدته
                              وانهينا تلك الهدنة
                              التي صمدت خلال هذه حرب الكاذبين هذه
                              كانت رؤية لحياة افضل
                              عندما تستطيع الموسيقى ان تغرق العاب القتل
                              في الليلة التالية جاء ظل الحرب و..
                              كلانا اطلق النار باسم الله على الاخر
                              تلاقت عينانا لحظة سقوطنا ارضا
                              وصداقتنا انتهت في هذه الفوضى المضطربة من الدماء



                              قد تكون هناك ملاحظات على الترجمة ... انني اترجم باحساسي وليس باسلوب اكاديمي او علمي ... انقل الترجمة كما شعرت بها حين قرأتها بلغتها الام وليس بما هو المفروض قواعديا وادبيا ... اذا كان لديك ملاحظات .. فرسائل الزوار مفتوحة للجميع

                              تعليق

                              يعمل...
                              X